荷蘭人咩時候會派餅？
話說最近離開咗舊崗位，但礙於在家工作嘅關係，未能夠返辦公室向同事派「散水餅」🍰
荷蘭人除咗離職嘅時候會派散水餅，其實仲有好多情況會有「派餅」嘅行為。咁幾時要派餅呢？
基本上，所有「可以慶祝」嘅情況之下，好多人都會選擇派餅。例如，啱啱畢業嘅學生，如果返工之後先至正式行畢業禮，行完禮之後循例都會向同事派餅（我當年都係咁）。
另一樣香港人/華人未必好理解得到嘅，就係壽星公都要派餅！係呀，如果你生日，你係需要帶蛋糕返公司派俾同事，而唔係你嘅朋友或者同事準備蛋糕同你慶生。
除咗派餅，亦有人選擇直接請同事放工去酒吧飲杯嘢。特別係如果有人升職，或者被公司外派開其他國家之前，都會請人飲嘢。
往日喺公司嘅時候，由於成日都有人慶生或者有其他好消息，淨係食蛋糕都食到肥，哈哈！在家工作超過一年，估唔到我居然會掛住公司附近啲蛋糕（仲要唔係咁好食）😢
不過，因為荷蘭逐步解封，應該好快就可以約返班同事出嚟見面，到時再派番餅囉～
#香港人
#香港人在歐洲
#荷蘭生活
#荷蘭工作
#海外市場
#海外求職
#求職攻略
Search